كلام كدا بالبلدي .. ناصر البدري خايف
يا جماعة لما الحكاية يبقي فيها ضغط لمحاكمة حسني مبارك وأسرته والضغط يكون قوي وممكن يؤدي لمحاكمة حقيقية وتوصل الحكاية للمطالبة بالحكم عليه بالإعدام( بعد الشر ) ويبقى المجلس الأعلى في مأزق بايخ بين إرادة الشعب في محاكمة الفساد وبين حماية الرئيس لازم الميدان يتفض بالقوة ولازم الشباب يبقوا بلطجية وحشاشين والبنات فتيات ليل ولازم ناس تطلع من كل حتة علشان يقولوا كفاية خربتوا البلد ويقولوا إن 25 يناير كان يوم أسود ولازم يتم التهديد بقوة والتحذير بشدة من مخالفة القانون - طبعا قانون حظر الاعتصامات اللي حكومة الثورة عملته بعد الثورة- ولازم يبقي اختراق حظر التجول اللي توقيته 3 ساعات مش فاهمين لزمتهم إيه يبقي جريمة كبرى ولازم نشوف ناس طالعة تقسم بالله العظيم انهم شافوا خالد سعيد نايم مع سالي زهران في الميدان بيعملوا حاجات قلة أدب وبرضوا حتكتشفوا إن البلطجية والصيع والخونة اللي في الميدان وراهم إسرائيل وأمريكا وانجلترا وفرنسا وإيران وحزب الله وتنظيم القاعدة بس المرة دي مش حيكون الإخوان المسلمين معاهم علشان الإخوان طلعوا وطنيين مش خونة وموجودين ضمن اللجنة التنسيقية العليا لجماهير الثورة المصرية اللي أنا وانتوا أكيد مش أعضاء فيها واللي مصدر مسئول منها فضل عدم الكشف عن هويته علشان مكسوف تقريبا صرح بإن أية اعتصامات أو دعوات للمبيت فى الميدان هى عمل فردى يخص كل فرد فرد وبيت بيت وزنجة زنجة لم تتم الدعوة له من جانب أي من القوى السياسية ودا معناه ان اللي بيباتوا في التحرير قوى طبعا مش سياسية.. ولازم طبعا الضباط اللي شاركوا في المظاهرات يطلعوا مفصولين من القوات المسلحة ويتقدموا لمحاكمة عسكرية ولازم يبقي في ضرب نار .. ولازم نخاف .. نخاف أوي .. علشان الحكاية مش هزار .. دا حسني مبارك ياجماعة مش أي حد .. ولا تكنوش فاكرينه صدام حسين؟ وأنا من جانبي بحذر كل بلطجي وكل شاب فاسد حشاش وكل فتاة ليل إن حد منهم يتهور ويتهم المجلس العسكري بإنه بيتباطأ او بيتواطأ أو بيقمع الثورة أو بيحمي ذيول النظام السابق او رؤوسه أو إن الجيش والشعب لا سمح الله مش إيد واحدة زي ما عمل الواد الخاين الخايب اللي اسمه مايكل نبيل اللي بيتحاكم دلوقت بحذر أنه حيشوف أيام سودة. وأنا عن نفسي وبقولها بكل صراحة أنا خايف .. أنا خايف.. أنا خااااااااايف.. أنا خايف
| 
