تماثيل خشب
تماثيل خشب كانوا الصحاب
وبيوتنا كانت علب
لا أرضنا كانت بتطرح سنابل
ولا كان لبيتنا جنينة تطرح عنب
شبابيك بيوتنا مكنلهاش عصافير
ولا كان يمام فوق الشجر يطلق سبايح
بلاستك ورد بساتنا الخزف
مكنلهوش روايح
كانت عيوننا إزاز
وقلوبنا كانت حنضلات
كنا بنتلملم جوا فراغ العقول
نتناقش في شكل الحجاب
ونختلف في معني الطهارة
ولما كنا نثور
نرفع علي بعض الورق
ولإننا
" وكل واحد مننا بطبيعته كان فارس وكان شاعر"
نسحب سيوف الكلام
ونطعن بعضنا في المشاعر
ولإننا
" الجبن مش من طبعنا .. لكن حكمة دينا كان منها السماحة "
كانت ثقافتنا العريضة تدلنا
" علي إن " هذا الكون شئ نسبي
فنقترح علي بعض الحياد
كنا بنمشي
ولما كان يطلع علينا الليل
كانت نجوم البارات تبعت شعاع النيون يداعب فوق سرير النهر أفكارنا السكاري بعهرنا المكبوت
فنضجع علي صدر أحلام عمرنا العريانين
كنا بنمشي
نطلق خيالنا في لحمنا
ومكنش شكل النهد في صدور البنات
يعرف معاني السر في قلوبنا
ولا لون عيونهم كان بيقرب للغموض السحر في عيونا
كان المدي في عنينا ضهر الزمن
ووشوشنا كانت آيات
بتدل علي إن الوجود الزيف بيملك ملامح
أجسادنا كانت خطوط من لوحة الرمز المجسد للفراغ " المشرئب " في عيون بعضنا
علي امتداد الكون الخط يفصل مابين لسمنت فوق الراس وبين لسفلت تحت القدم
كنا تصاوير للعدم
كنا بنمشي
ولما نجوع
كنا بناكل لحم أمواتنا
ونرمي بعضنا بالخيانة
كنا بنمشي لجل ما ننسي
ولما يملنا النسيان
نقطع مللنا بالغني
" نسينا إننا .. نسينا واحنا مش داريين "
نرددها لحد الصبح ما يطلع علي عنينا
كنا بنجري
ونداري ف منامتنا
ننام .. ننام
لحد ما ف لحظة نقوم مفزوعين
خايفين لحسن نكون
متنا
ــــــــــــــــــــــــ
القاهرة
ناصر البدري
