 |
أحلام مصرية
الموقع الشخصي للأديب المصري
ناصر البدري |
|
القائمة الرئيسية
استطلاع رأي
إحصائية
المتواجدون الآن: 1 زوار: 1 مستخدمين: 0 |
أحلام تموتأحلام تموت
أنا كنت ماشي في سكة ضلمة مخطوف حنين
معصور وجع وقعت عليا عيون قمر م السما الله علي الدنيا الحزينة لما تتبسم الليل بيضحك ضحكة حلوة وترسمت الفرحة علي وش الفضا ولقتني فجأة .. راجع بضهري سنين طوا ل علشان أعيد الحلم من تاني الدنيا زي جنينة ساعة فجر وانا طفل بلعب فوق بساط من ورد والخضرة لفاني ورشرشات الندي مالية المسافة بين سما زرقا وشعور جميل بالصفا بددلي خوفي فارد كفوفي لاجل ما استقبل الدنيا الجميلة المبهجة انا طفل متمرمغ براءة نايم علي ملاية حرير شعرها حتى السواد أوقات بيشع نور وانا طفل بتنطط علي الخضرة متبعترة فراشات جميلة صغيرة حواليا عايمة علي نور ملون شيلاه علي كفوفها الصغار حبات نسايم فرحانين لفحت خلايا بشرتي بخفة الليل ضحك ضحكة فتفككت الكرمشات من علي وشي القديم نعمت خدودي حسيت كأني سحابة طايرة في السما واتمددت في الكون حدودي يارب خير اجعله والنبي الدنيا زحمة ناس كتير مستغربة فاتحين عيونهم علي الآخر والقمر قاعد علي الكرسي الحجر وكأنه واحد مننا ماسك في ايده كتاب يسمع كلام الناس ويخجل زي حباية فراولة يشرب عصير تفاح ويدخن سجاير مارلبورو القمر بيمشي في الشوارع زينا وبيركب المترو وانا لسه بحلم والحلم زي حبة الرومان أو زي البرتقانة وانا لسه بحلم نايم ومش نايم فارد ضلوعي فوق بساط أخضر عنيا فوق في السما وزقزقة عصافير في ودني رفرفرت قدام عنيا رفرفرت روحي ولقتني طاير لفوق وبمد ايدي عشان المس خدودها بصوابعي بحلم بلمسة ايديكي ايدك في ايدي لحد آخر الدنيا واخر نفس في الصدر عنيا في عنيكي ــ بتبصلي كدا ليه؟ معلش بحلم بس ياخسارة صحيت ولقتني قاعد جوه زنزانة والقمر قاعد مكانه بعيد لميت ايديا وحسيت برعشة في كفي وعرفت ان الخطوتين مش خطوة واحدة وعرفت ان العمر مهوش مكفي ولقتني فجأة كبرت من تاني فتحت عيني حسيت بأن الكون فضي وبقيت لوحدي والحلم زي حبة المشمش أو زي غزل البنات حدوتة دابت خيوطها في لحظة يااااااااه دلوقت بس عرفت ان للأحلام تمن وللأحلام شروط وانا كنت مشروط بسكينة تجاربي خير اللهم ما اجعله خير علي قد ما الحلم كان جوايا زي العيد انا قولت يارب محلمش تاني خليني قاعد مكاني مطحون بهمي معضوض بناب الزمان اللي عدي ملدوغ في دمي بعقارب الساعة الغبية اللي مبطلتش تلف عل الفاضي طب ليه يارب ما انا كنت راضي وحفظت سكة غربتي كويس وعرفت بمشي ازاي في توهتي وعرفت ان في وحدتي القاضي مشغول وفاضي مشحون بحلم كبيييييييييير بس مأجله يمكن لحد ما موت عارف ملامحه كويس بس مشفتهوش خلصت كل اللي عرفتهم من وشوش وملقتهوش ومفيش مشاكل اديني بكتب قصايد وبحطها في قلبي وحفضل مخبي لحد ما يبانلي صاحب ومنيش مصاحب غير عنيكي المغروزين جوايا ححفظ هوايا زي ماحفظت اسمك ونقشت جوا القلب رسمك طب ليه يابنت الناس تجيني وقت ما الأيام تفوت عشان تشوفي تنية الضهر اللي كان مفرود وتد مغروز في قلب الكون؟!! وانا عندي كل شئ بيهون إلا نظرتك طب ليه تجيني في آخر المشوار عشان تشوفي الكرمشات في الوش .. والتجعيدات في الروح؟!! وانا فين اروح بعد ما الايام فاتتني معقول تجيني علشان متعرفنيش لما تششوفيني ؟!! طب ليه يارب تحكم عليا الدنيا بجرح تاني وانا لسه جوايا الجروح مفتوحة منيش يارب حمل جرح جديد علي كتافي تقل الحديد ولقتني نازل م السما محدوف علي وشي واقع زي طير مكسور جناحه ومتلقح علي الأسفلت معصور وجع مخطوفة روحي الارض من تحتيا سودة والدنيا ضلمــــــة ــــــــــــــــــــــــــــــــــــــــــــــــــــ ناصر البدري القاهرة 2008 |
بحث
نتيجة
|
||||||||||||||||||||||||||||||||||||||||||||
Copyright MyCorp © 2024
