أحلام مصرية
الموقع الشخصي للأديب المصري
ناصر البدري

 الرئيسية  بياناتي  دخول  خروج

تسجيل الدخول
استطلاع رأي
قيم موقعي
مجموع الردود: 17
إحصائية

المتواجدون الآن: 1
زوار: 1
مستخدمين: 0

هلال جديد

هلال جديد
 
وادي الولاد في الحارة بتجرب الفوانيس
وانا قاعد في بلاكونتي بجرب خيالي
قصيدة تنفع بدن للوحدة والذكريات
جسد بيحمل ملامح غربتي وسهري
وشه فحلاوة لهفتي وشوقي
وعيونه بتشع رغبة
لاكن شفايفه بترتعش من الخوف
قلب انفطر من القلق
وروح بتنهج من وطأة الانتظار
إزاي بحبة كلام أقدر أصيغ دمي
وارسم مشاعر محدش حسها غيري ؟
***
*** وادي الولاد بتمرجح الفوانيس
وحوي يا وحوي .. اليوحة
طوابير فرح دايره تلف الشوارع
بتفرق شربات الأمل علي الشبابيك
وانا ليه محدش جه يدوقني ؟
جنب البيوت اتجمعوا السهرانين
عاملين دواير من غنا وحواديت
قاعدة لحد الفجر
ببان كتير مفتوحة علي بعضها
وخارجة منها الأيدين تتبادل الأمنيات
وأنا ايدي ليه فاضيه
ونفسي مكسورة
خيوط النور متعلقة علحيطان
متزوقه بهجة
ومغرقة الدنيا بزحمة الألوان
واشمعنا ليل عمري اللي ما نورش
هلال جديد بان في السما
لاكني ما شوفتوش
رمضان جديد جه بدون ما انتبه
وانا من زمان صايم ومفطرتش
أداني لسه مادنشي
ومدفعي قاعد علي الطبية القديمة وحيد
مستني يجي اليوم ويكتشف صوته
لو مرة واحدة قبل نهاية الخدمة
قلبي نشف ملعطش
وروحي مسخسخة من الجوع
وعنيها لسه مصدقتش
ايديها ماتمدتش
عشان تجرح صيامي بحبتين فرحة
شفايفها ما قلتليش سمي
وادتني حبة حنان
أبل بيهم مشاعري
الليل بيسري بسرعة في دمي
وانا لسه قاعد متلهي فـ همي
كان نفسي الحق وياهم التراويح
الصبح طالع من جديد تاني
وصبري خلاني
أثق في إيماني
لاكن جوعي فاق حدود قدرتي
وعطشي زايد عن حدود إحتمالي
أمد إيدي أسأل سبيلها المدد
تمد إيدها تشدني من سؤالي
رمضان كريم
طبعاً
لاكن ياريته يكون أكرم شوية السنة دي
ويخلي ليلة القدر
تبعد شوية نور لشباكي
يمكن يصادفوا دعوتي باللقا
رمضان يعدي .. وبيعدي وراه رمضان
أعياد كتير مرت
وانا عيدي لسه مجاش
هدومي الجديدة
دابت علي الشماعات
خايفين يموتوا مرركنة جوه الدولاب
خايف أموت من قبل ملبسهم
تلاتين سنة واقف في شباكي
الدنيا براه بتتضحك
بس انا باكي
مادد إيديا لاحتمال جيتك
تخديني من ألمي ومن وحدتي
دنا نفسي اروح وياكي سوق العيد

ــــــــــــــــــــــــــــــــــــــــــــــــــــ
القاهرة ناصر البدري
بحث
نتيجة
«  مارس 2024  »
إثثأرخجسأح
    123
45678910
11121314151617
18192021222324
25262728293031

Copyright MyCorp © 2024