 |
أحلام مصرية
الموقع الشخصي للأديب المصري
ناصر البدري |
|
القائمة الرئيسية
استطلاع رأي
إحصائية
المتواجدون الآن: 1 زوار: 1 مستخدمين: 0 |
مصلوب علي باب المدىمصلوب علي باب المدى
بستنظرك
من يوم ما نيني القلب قالك بنظرك
بستنظرك
من يوم ما قلب النيني حدد منظرك
ثلاثين سنة قاعد علي باب المدى
فارش بشوقي
فارد بساط عمري علي درب احتمالك
ونقشته بعروقي
مليت حروف إسمك لكل مين عابر
وما مليت
يا للي انتظارك مر
ما تمري
مرر في حلقي الشهد لما مرار بعادك مر في عروقي
بستنظرك توقي
باللي ابتسام الفجر ساكن بين شفا يفك
ليل فراقك جوه عتمة غربتي
بيفجرك شوقي
بستنظرك
منظور تجيني ولا مش منظور؟
منظورة يمكن
علقت قلبي في سلسلة
رشيت بخور عشقي علي جمر اشتياقي
هزهزت قلبي بأيدي
طقطقلك رقي
برقيكي ياسمرة
من كل عين ضامرة
وفي كل عين شافت ولا حبت
من نار حنيني اللي بتشوقي في جلد روحي
بصبلك جمرة
قصقصت قلبي عروسة
وحرقتها في يدك
ورسمت قلبي صليب علي خدك
مصلوب أنا
كما شعاع الشمس فوق وش الفضا
حبك قضى
وانا اللي عمري ما بين دروبك انقضى
عمري دا كانلك رحلتي
يا دنيتي
يا محنتي
مابين شعاع الضي في عنيكي الوطن
والليل عطن
فدادين بتبلع خطوتي
وغيطان مليها الشوك بتقطع سكتي
يا وحدتي
وحيد أنا
كأني فرخ يمام بتفقس دحته وسط الديابة
مولود في أرض الكفر لجل أكون نبي
من غير صحابه
غريب أنا
يا موطني
باللي احتمالك شدني
ياللي فراقك هدني
ياللي ابتسامة نيني عينك من خلايا الدم كانت في استكانتي تهزني
مش حنحني
مش حنكسر
مهما طاردني الموت وحاصرني الخطر
حبك قدر
مكتوب علي جبيني
مكتوب علي جبيني مشربش إلا ميتك
أو إني من عطشي أكونلك
ميتك
مكتوب أكون حباية في ترابك تخضر جنتك
من يوم ما خط الكون علي صفحة سحابه
أول تواريخ المطر
يا بسمة النرجس في تكشيرة حياتي
يا ريحة النعناع في تصبيحة ميلادي
يا فجر عمري المنتظر
عاشق أنا
زارع منى
بادر غنى
موالي كان الصبر
وصبارات صبحت عروق دمي
ياللي انغرزتي في بور حياتي
بزراية الحلم اللي طرحت سوسنة
قربك دنا ؟
ولا انكتبلي أموت علي درب اشتياقي
اللي في لحظة مولدي ليكي ابتدا
أنا عمري كله معشتهوش
واخترت انه يكون لقاكي المبتدا
رحال أنا
فتشت عنك بين خلايا الموج وحبات الندى
فتشت عنك بين حبابي الرمل وكهوف الجبال
فتشت عنك بين كفوف النجم وقلوب الرجال
فتشت عنك بين وشوش كل البشر
المخلوقين ملايين
لجل ما تتسع دايرة متاهتي
وفي كل تقاطيع البنات
اللي تمر ما بين خلايا وحدتي
وتخطي فوق أرضك مشاعري
اللي رويها بدمعتي
مستني تطرح يوم ظهورك
بستان زهورك
فتشت عنك ريش جناح كل الطيور اللي بتقطع غيم سمايا
من غير سلام
ترميه علي عيون الشريد
الحيرانين
المجهدة
كانت تمر
أنا شوفت فيكي المر
وجاهدت فيكي الموت
حشود
من الإيدين الكره خوف طراطيف أنامل كف شوقي المجروحين من شوك مواسم غربتك تلمس إيدينك
منبوذ بدينك
واخترت إني أكون لعينك
عبد حر
مرضتش إن يكون لغيرك مذهبي
واخترت إني أكون نبي
يحمل رسالة وحدانية هيئتك
وإمام مريدينك
لو إني اهاجر كل يوم من غار لغار
أو انقتل
فأكون شهيد رحلة إيماني بطلعتك
لو لأحوني في ألف بير
أو يحدفوني في ألف بحر لألف حوت
أو يحبسوني في ميت تابوت
أنا مش حعود
لحد ما يطلع نهارك
أنا في انتظارك
مش راح أموت
لحين ما حيحين الميعاد
واتلو علي الدنيا شهادة منظرك
بستنظرك
بستنظرك
بستنظرك
ــــــــــــــــــــــــــــــــــــــــــــــــــــــ
ناصر البدري القاهرة - يناير89
|
بحث
نتيجة
|
||||||||||||||||||||||||||||||||||||||||||||
Copyright MyCorp © 2024
