شارع الأزهر
ياخسارة يا شارع الأزهر
انت ليه شكلك غريب أوي النهاردة؟
ملامحك ليه كئيبة
وطولك مستفز
ليه زحمتك مش ونس؟
وريحتك مبقتش ريحة زمان
مبقتش ليه صاحبي القديم
اللي بيوصلني اخر الليل
لحد ما اركب من العتبة
علشان ميسبنيش لوحدي في غربتي
ليه النهاردة كرهتني وكرهتك؟
ليه فجأة بتتحول لديب مسعور؟
بيقطع عليا الطريق وينهش مشاعري
رصيفك سكين بتقطع روحي بالراحة
لكن بعمق شديد
وزحمتك خنقة وضيقة نفس
وايه كل الحديد اللي انت لافف بيه وشوش الناس دا؟
وايه لسمنت اللي انت شايله فوق دماغك؟
هو انت شارع ولا زنزانة؟
طب ممكن اعرف انت تاعب نفسك ليه النهاردة
وجي وجايب معاك الناس من العتبة لسيدنا الحسين؟
عشان تاخدني من ليل طويل كان نفسه يبقي جميل ومقدرش؟
ولا من حبتين فرحة سايبهم من يومين في السكرية
مستنيني هناك
تايهين في زحمة رقص وغنا ومزازيك
ولا من حديقة الخالدين
اللي قاعدة مخنوقة في حبستها جوه السور
بتستني تشم ريحة الورد
واحنا معديين عليها من القلعة اللي واقفة من سنين بتحرس وحدتي
دلوقت بتستناني اعدي عشان تبتسم
وترفع ايديها تبارك خطوتي معاها؟
ولا جي عشان تشوفني في موقف جديد من الحياة والموت
وتشمت فيا
وتثبتلي ان انا مش حر عنك؟
وانت ياعم ياللي سميت نفسك حبيب
بتعلم الناس المحبة
وتشرح للصحاب يعني ايه ان الحياة تساوي الحب
والدنيا يعني الحبيبة
عملت نفسك شاعر
وعملت من روحك ربابة
ومن مشاعرك وتر
ومن سنين عمال تغني
موال طويل
سميته صبر ولقي
يعني كان لازم تستني كل الوقت دا
تخلص كل السنين دي
واللياليي والامل والصبر والوجع
وتنتظر لحد ماتروح الحسين
يوم الخميس 22 وعشرين نوفمبر الفين وواحد
عشان تواجه حقيقتك
تقابل ضعفك هناك
تكتشف عجزك
وتتلقي درس جديد
تتعلم ان الحياة مش بس حبة مشاعر تعيشهم لوحدك
مش بس فرحة لقي بعد انتظار
مش بس حبة أمل وحبة خوف
مش بس حلم بنجري وراه سنين
لحد مانشوفه بعنينا
مش بس حبة امنيات
ياتعيشها
ياتموتك
الدنيا مش بس الحاجات ديا
الدنيا اصعب من كدا بكتير
الدنيا ناس تانية
قدر ومستحيل
واديك اهه واقف قدام حبيبتك
هي بشحمها ولحمها
حلم متجسد بجد
مش بس فكرة وخيال
بينك وبينها سنتميترات قليلة
وعمر راح
وعمر يمكن مش حيجي
وريني تقدر تعمل ايه دلوقت
حتقدر تمسح الحزن اللي في عنيها
بنظرتين الحب ؟
تقدر تزيح جبال الهم عن صدرها
بلمسة حنان؟
تفك عن روحها قيود الماضي المؤلمة
تحرر قلبها من الخوف
وملامح وشها من الألم
ترجع حلمها لزمن قديم
او تخلقلها زمن جديد علشان تعيشه؟
تقدر تخش عروقها من جوه
تبرد دمها بحبة حنان؟
تقدر تعيشها الامان اللي انت نفسك مش لاقيه؟
تقدر تخلي الدنيا اللي مش مستاهلها خضار عنيها تبقي اجمل من كدا ؟
تنقذ نهارها من الملل والضيق
وليلها من سطوة الناس والبيوت
تقدر تكون فارس بجد
تركبها حصان الوقت
وتحط في ايديها اللجام؟
ولا تعترف انك قليل الحيلة
وتكتفي بانك تداري خوفك وقلقك بابتسامة عبيطة
وكلمتين فارغين
ميطيبوش الجرح
وهي واقفة
وانت واقف زي تمثال من وجع
جنب سور النفق
في اول شارع الأزهر
ــــــــــــــــــــــــــــــــــــــ
القاهرة
ناصر البدري
انت ليه شكلك غريب أوي النهاردة؟
ملامحك ليه كئيبة
وطولك مستفز
ليه زحمتك مش ونس؟
وريحتك مبقتش ريحة زمان
مبقتش ليه صاحبي القديم
اللي بيوصلني اخر الليل
لحد ما اركب من العتبة
علشان ميسبنيش لوحدي في غربتي
ليه النهاردة كرهتني وكرهتك؟
ليه فجأة بتتحول لديب مسعور؟
بيقطع عليا الطريق وينهش مشاعري
رصيفك سكين بتقطع روحي بالراحة
لكن بعمق شديد
وزحمتك خنقة وضيقة نفس
وايه كل الحديد اللي انت لافف بيه وشوش الناس دا؟
وايه لسمنت اللي انت شايله فوق دماغك؟
هو انت شارع ولا زنزانة؟
طب ممكن اعرف انت تاعب نفسك ليه النهاردة
وجي وجايب معاك الناس من العتبة لسيدنا الحسين؟
عشان تاخدني من ليل طويل كان نفسه يبقي جميل ومقدرش؟
ولا من حبتين فرحة سايبهم من يومين في السكرية
مستنيني هناك
تايهين في زحمة رقص وغنا ومزازيك
ولا من حديقة الخالدين
اللي قاعدة مخنوقة في حبستها جوه السور
بتستني تشم ريحة الورد
واحنا معديين عليها من القلعة اللي واقفة من سنين بتحرس وحدتي
دلوقت بتستناني اعدي عشان تبتسم
وترفع ايديها تبارك خطوتي معاها؟
ولا جي عشان تشوفني في موقف جديد من الحياة والموت
وتشمت فيا
وتثبتلي ان انا مش حر عنك؟
وانت ياعم ياللي سميت نفسك حبيب
بتعلم الناس المحبة
وتشرح للصحاب يعني ايه ان الحياة تساوي الحب
والدنيا يعني الحبيبة
عملت نفسك شاعر
وعملت من روحك ربابة
ومن مشاعرك وتر
ومن سنين عمال تغني
موال طويل
سميته صبر ولقي
يعني كان لازم تستني كل الوقت دا
تخلص كل السنين دي
واللياليي والامل والصبر والوجع
وتنتظر لحد ماتروح الحسين
يوم الخميس 22 وعشرين نوفمبر الفين وواحد
عشان تواجه حقيقتك
تقابل ضعفك هناك
تكتشف عجزك
وتتلقي درس جديد
تتعلم ان الحياة مش بس حبة مشاعر تعيشهم لوحدك
مش بس فرحة لقي بعد انتظار
مش بس حبة أمل وحبة خوف
مش بس حلم بنجري وراه سنين
لحد مانشوفه بعنينا
مش بس حبة امنيات
ياتعيشها
ياتموتك
الدنيا مش بس الحاجات ديا
الدنيا اصعب من كدا بكتير
الدنيا ناس تانية
قدر ومستحيل
واديك اهه واقف قدام حبيبتك
هي بشحمها ولحمها
حلم متجسد بجد
مش بس فكرة وخيال
بينك وبينها سنتميترات قليلة
وعمر راح
وعمر يمكن مش حيجي
وريني تقدر تعمل ايه دلوقت
حتقدر تمسح الحزن اللي في عنيها
بنظرتين الحب ؟
تقدر تزيح جبال الهم عن صدرها
بلمسة حنان؟
تفك عن روحها قيود الماضي المؤلمة
تحرر قلبها من الخوف
وملامح وشها من الألم
ترجع حلمها لزمن قديم
او تخلقلها زمن جديد علشان تعيشه؟
تقدر تخش عروقها من جوه
تبرد دمها بحبة حنان؟
تقدر تعيشها الامان اللي انت نفسك مش لاقيه؟
تقدر تخلي الدنيا اللي مش مستاهلها خضار عنيها تبقي اجمل من كدا ؟
تنقذ نهارها من الملل والضيق
وليلها من سطوة الناس والبيوت
تقدر تكون فارس بجد
تركبها حصان الوقت
وتحط في ايديها اللجام؟
ولا تعترف انك قليل الحيلة
وتكتفي بانك تداري خوفك وقلقك بابتسامة عبيطة
وكلمتين فارغين
ميطيبوش الجرح
وهي واقفة
وانت واقف زي تمثال من وجع
جنب سور النفق
في اول شارع الأزهر
ــــــــــــــــــــــــــــــــــــــ
القاهرة
ناصر البدري
